Qarabağ "pley-off"-a yüksəlsə, bu komandalardan biri ilə qarşılaşacaq

UEFA ekspertlərinin hesablamalarına əsasən, “Qarabağ”ın Liqa mərhələsini ilk 24 komanda arasında bitirərək “pley-off”a yüksəlmək ehtimalı 90 faiz təşkil edir. Ağdam təmsilçisi “Liverpul”la oyunda qalib gəlsə və ya heç-heçə etsə, növbəti mərhələyə vəsiqəni öz gücü hesabına təmin edəcək.

Komandamızın məğlubiyyəti halında isə “pley-off”a çıxış digər oyunların nəticələrindən asılı olacaq. Son turda keçiriləcək 7 qarşılaşmanın nəticəsi “Qarabağ” üçün xüsusi önəm kəsb edir. Məsələn, “Barselona” – “Kopenhagen” matçında ispanların uduzmaması və eyni zamanda “Napoli” – “Çelsi” oyununda ingilislərin məğlub olmaması “Qarabağ”ın növbəti mərhələyə avtomatik vəsiqə qazanması üçün kifayət edəcək.

Əgər “Qarabağ” “Liverpul”a uduzsa, aşağıdakı görüşlərdən ən azı ikisində qeyd olunan klubların məğlub olmaması komandamızın “pley-off” şansını qoruyacaq:

- “Napoli” – “Çelsi”

- PSV – “Bavariya”

- “Monako” – “Yuventus”

- “Bayer Leverkuzen” – “Vilyarreal”

- “Atletik” – “Sportinq”

- “Ayaks” – “Olimpiakos”

- “Barselona” – “Kopenhagen”

Qeyd edək ki, “Qarabağ” “pley-off” mərhələsinə yüksələcəyi təqdirdə İngiltərənin “Nyukasl”, İtaliyanın “Atalanta” və ya “İnter”, Almaniyanın isə “Borussiya Dortmund” klublarından biri ilə üz-üzə gələ bilər.

Ümumilikdə “Qarabağ” da daxil olmaqla 18 komanda Çempionlar Liqasının “pley-off” mərhələsi uğrunda mübarizə aparacaq.